Ayɛɛd wɛrɛgɛ nico Luka baal bodo buk ayɛɛd wɛrɛgɛ o kaal o agɔɔn toonnyawa e. Alaŋ waanice niini een Juzen, bar olla niini eet ci aganek zɔɔz ween Garik ɔrɔɔt ma iiya izi Kiristan. Iiya oorkorit waanice ki Pɔl kironnyowe ogin baal uwayi kaaviyak o Yeso e. Ayɛɛla wɛrɛgewe nico baayiz ki liŋliŋɔn o Yeso goole ci azɛɛdi ka kejezit ɔl o alaŋ eegin Juz juruŋ.
Azaacek Luka zoozok ci meel wɛrɛgɛ cin o zoozok calaŋ kaaviyawe ci gaga e ɛɛl tɔ, kiyo tiryan o Jɔn o oonyi ki tiryan ki roktan o Yeso kibeen uwayi o Jɔn o oonyi. Ayelza buk zɔɔz ci arɛɛzi Tammu ɔl dook kɔkɔm ŋɔrɔwɔnɛt. Ayelza Yeso zɔɔz nico gi ci aduwan Yabzinok ci ɛɛl kiyo yabzin ci eet o Samariya abona (zooc 10) ki yabzin ci logo ci akoloni (zooc 15) kibeen avuzit o aromɛn ki eet o abornɛ alot meeri (zooc 19) kibeen zɔɔz o aṯɛrkɛdɛkɛ rogɛt o colai eet ween agoryai adɔdi (zooc 23).
Aduwa Luka laak ci meel gɛr zɔɔz ci akati liŋliŋɔn o vɔŋiz o Tammo baayize o Yeso kibeen liŋliŋonte onin, ma buk aduwa zɛɛmit baal adica Yeso ŋaryiinta e. Mazi aṯornɛkɛ wɛrɛgɛwi aduwa niini kaal baal agooni iinyaye baal ayelzakɛ Yeso ɛlɛ nuyak ogin vurute o itiŋawi daayiza e. Kaal nicaga ayelza gi o orogi didi Yeso bodo.
