Ayɛɛd wɛrɛgɛ nico Luka baal buk ayɛɛd wɛrɛgɛ o kaaviyak o Luka e.Wɛrɛgewe nico aduwa niini gɔɔl o uwayi nuyawa o Yeso zɔɔz o akati nɔɔnɔ looce uneeŋ ɛlɛ ki loocowe ci ɔl oogi vurute baal ooyi niini tammu tadena e. Aduwa Luka gɔɔl baal akunakɛ vɔŋizi o Tammo nuyak o Yeso dook Jerusalɛma ɔɔwa e, ma ka kɛmɛda kaavu kɛbɛk ma aanyek nɔɔgɔ dɔɔyiz ki alaat ugeec e.
Zooce 1 zɛɛ been 12 aduwa Luka kaal o agɔɔn Pitɔr ki gi o agoononek ɔl ween Kiristan Jerusalɛma. Laak ci meelik ɔrɔɔt atirit vɔŋizi o Tammo nɔɔgɔ kagaac gi o arɔɔŋi Tammu kaaviyak o Yeso Kiristo kuwaktozek ɔl modene dook calaŋ een Juz doon.
Ma zoone ceen 13 zɛɛ been 28 o aduwa Luka zɔɔz o aŋidi vɔŋizi o Tammo Pɔl ween toonnyai ka kooyi kaaviyak o colai vitɛnane ci meelik looce o Asiya ki Oroba ma vuruta iiya ooyi Kutuure o adikir kazi Room. Zoozowe nicoko oromek Luka zoozok ci meel uuwayi Pɔl ki toonnyak oogi. Kaal nicigi atiritet ageet kagaac gɔɔl baal uwayɛkɛ niigi kaaviyak o colai akati Yeso ɔl ci aŋɔrɔwɔ iinyaye ci aŋɔrɔwɔ e.
