Ci kazi Kolosiya o kutuur ci adikir abil looc o inoko awɛ zaara o kazi Turkiya libire ci nyakjo e. Maje Pɔl ceen toonyai o ŋaan laadun niini alya kook ŋinaante, olla bar abaabani eeci azii awaaŋ ci azi ɔl nɛ, anyawun olee o tuwento ŋinaante demezok ci voloŋo. Ma anek demezowa ci voloŋo noko ɔl o tuwento ŋinaante nɛ, abon azunu kɛranɛ o ɔl o Juuz, kiyo teedinɛt kibeen diŋdiŋani ci kadiŋdiŋani toonnyak o Tammo ka katalɔ Tammu. Ɛtɛyɛɛd ni Pɔl waragɛ nico ka kaadak ɔl o tuwento kagaac niigi daayiz o Kiristɔ doon o arogoz nɔɔgɔ, ma inoko o Kiristɔ aavi tamma ma abal niini toonnyak o Tammo dook kibeen buk vooŋizok oogi, been kaal dook loota ki tammu tadena. Giye nico enek Pɔl nɔɔgɔ nɛ, alaŋ bodo ka uzuuti kɛranɛ oogi karabɔŋ een kaal oogi ci ademzekuŋ ɔl, bar abon adiŋdiŋanu niiga Kiristɔ doon. Ma aadak buk nɔɔgɔ gi ci abon niigi baayize uneeŋ ayelza gi o eeginɛ niigi ɔl ci Tammo aŋɛryai.
