Kutuuri ci kazi Vilipiya o, aavi looce o kazi Masedoniya, ma Masedoniya, looc ci mayan kidicilim ci abil looce o kazi Giriiz libire ci akɔ ki baatikeeri e. Uuwak waanice Pɔl zɔɔz o Tammo ŋinaante (Toonnyak 16), makacin utuyɔ ɔl ŋinaante. Ma irkitowe ci miliny nɔkɔ, acabɛ Pɔl sijina, odomata ni ɔl o tuwento Vilipiya, itoonek nɔɔnɔ guruuc ci atirti. Ɛtɛyɛɛd ni Pɔl waragɛ ci atalni nɔɔgɔ giye o agoonek niigi nɔɔnɔ.
Ma waragewe nico, anek buk bodo niini nɔɔgɔ nɛ, alaŋ kaŋole daayiz, ma adizkek nɔɔgɔ ka kurukteek zɔɔ looc tuwente uneeŋ, yonuun tɛ avuunak nɔɔgɔ gideenowa. Ma iloot nɔɔgɔ ka calaŋ adɔŋ eleeti, bar abon alaca eleeti kiyo buk baale Yesu e. Ma aadak nɔɔgɔ gi o odoyɔi niigi ki Kiristo rogɛɛta, gi ci aanyek Tammu nɔɔgɔ irkɛɛnta, abon zin niigi alaŋ ano ɔl o ademzek ɔl zoozok o voloŋo, ɔl o ademzek ɔl gi o bodo abon azooni ɔl zoozok o Tammo rɛɛn baal aanyek Tammu ɔl o Juuz e.
