Ayeedek Pɔl waragɛ nico ɔl o tuwento abaak looce o kazi Korontiya. Ma Korontiya kutuur ci appe ci abil looce o kazi Giriiz. Akana waanice zɔɔz ci tuwento ŋinaante Pɔl, ma gɔɔn waanice eronoonek niini nɔɔgɔ akɔ acin, mazi ŋaan awɔ gɔɔla, itoonek rak nɔɔgɔ waragɛnya ci adizkɛɛki nɔɔgɔ, maje waanice gi baal abacɔn ɔl o tuwento maany e, ŋaan kidicai nɔkɔ.
Ayeedek zin Pɔl nɔɔgɔ waragɛ nico o, arɔɔŋ kitirit nɔɔgɔ ka kidica kaal ugeec abacɔn iŋaan niini kuruum nɔɔgɔ. Ma bar kizik da ɔl ogɛɛn olee ci tuwento abaak looce ci kazi Korontiya noko, abar Pɔl giye ci kizi aminaŋi Pɔl guruuc ci ɔl o tuwento, makacin aanycek Pɔl kizi eet ci alaŋ een toonnyai ci Yesu didi. Mazin waragewe nico, ayɛɛd Pɔl ɔrɔɔt zɔɔz ci akati ɛlɛ onin ɛlɛ, kibeen liŋliŋɔn o uuwayi kaviyak o Yesu abon, o awaak Tammu nɔɔnɔ ka kiiya kiliŋliŋ. Ma ademzek buk niini ɔl o tuwento gɔɔl ci ka kiliŋliŋti guruuc goole ci atiriti ɔl o tuwento, kibeen liŋliŋɔn o ɔl o Tammo vitɛnaane ogɛɛn (Zooc 9-10).
